Inklusioaren aldeko Kirola Elkarrekin festa ospatu dute Legazpin. Atzegik antolatuta, hamabi elkarteetako 430 kirolari elkartu dira igeriketan, futbolean, mendian, palan, bola jokoan, bizikleta estatikoan, saskibaloian eta zumban aritzeko.
Iraia Mendia lazkaotarrak 20 urtez azpiko Espainiako txapelketa irabazi du. Pista estaliko 3.000 metroko lasterketan eskuratu du urrezko domina. Danel Perez ordiziarrak laugarren postua lortu zuen altuera jauzian.
Erlezain eguna ospatu dute gaur Zegaman. Pandemiagatik, bi urtez ez dute ospatu eta jendea gogotsu itzuli da. Gipuzkoako XXII. Ezti Lehiaketa Legazpiko Jose Antonio Galdosek irabazi du.
Beasaingo XII. Herri Lasterketa ospatu dute gaur goizean. Lasterketa mistoan, Garikoitz Bravok eta Maite Arraizak osatutako bikotea nagusitu da; gizonezkoetan, David Martin; eta emakumezkoetan, Nerea Etxeberria.