Pilota goxoarekin gazteen eta seniorren finalak, eta mistoarekin Promoziokoa antolatu dituzte, binaka. Ataunen, gizonezkoen Promozioko binakako finalaurrekoa, ostiralean
Emakumeen kirolaren plaza bihurtuko da Goierri asteburuan, beste behin. Emakume Master Cup Binakako Txapelketaren VI. ekitaldiaren amaierako hiru partida Gabirian jokatuko dituzte, larunbatean 17:30ean hasita. Hiru partida izango dira jaialdian, txapelketan bereizi dituzten lau modalitatetik hiru, hain justu: pilota goxoarekin gazteen eta seniorren finalak, eta ukitudun pilota mistoarekin Promozioko finala. Laugarrena, pilota mistoko eliteena, Irunen jokatuko dute, martxoaren 27an.
Alkainburu pilotalekuan bukatuko dute, hala, binakako txapelketako beheko hiru kategorietako pilotariek. Lehenengo aldia da Euskal Herriko mailako lehiaketa bat bertan antolatu dutena. Sarrera 2 euro kobratuko dute.
Goierrin ligaxkako jaialdi ugari jokatu dituzte Master Cupen. Ormaiztegin, Beasainen, Seguran eta Legazpin, esate baterako.
Ataunen profesionalak
Ez da eskualdean goi mailako pilota jaialdi bakarra izango. Ostiralean, Ataungo Auzoetan, gizonezko profesionalak ariko dira. Binakako Promozio Txapelketako finalaurreko bat jokatuko dute, jaialdiko lehenean. Xabier Erostarbe atzelari urretxuarra Salaberriarekin ariko da, Zabalaren eta Oier Etxebarriaren aurka, finalerako txartel bila.
Hain justu, erakustaldiko bigarren partidak ere ikusmin handia eragin du. Bi profesional ataundarrek —Iraitz Zubizarretak eta Jon Ander Albisuk— bikotea osatuko dute, eta Alberdi II.a eta Mariezkurrena II.a izango dituzte aurkari.
Zubizarretak eta Eskirotzek tanto batengatik ez zuten lortu finalaurrekora iristea, duela bi aste. Aspaldiko partida luzeena (2 ordu eta 2 minutu) eta gogorrena (1.294 pilotakada) jokatu zuten Zabala-Etxebarriaren aurka.
Azkenik, zapatuan Iruñean, Iker Irribarria aramarrak Binakako finalera sartzeko jokatuko du, Beñat Rezusta lagun. Elezkano-Zabaleta dituzte aurkari.
Pilota jaialdiak
ATAUNEN OSTIRALEAN
Eguna. Ostirala, martxoak 18.
Ordua. 22:00.
Tokia. Auzoeta frontoia.
Sarrera. 20 euro (haurrek 15).
Saltokiak. Troskaeta, Martintxo, Sutegi eta Errotaundi.
1. partida. Binakako Promozio finalaurrekoa: Salaberria-Erostarbe / Zabala-O.Etxebarria.
2. partida. Zubizarreta III.a-Albisu / Alberdi -Mariezkurrena.GABIRIAN LARUNBATEAN
Eguna. Larunbata, martxoak 19.
Ordua. 17:30.
Tokia. Alkainburu frontoia.
Sarrera. 2 euro.
Finalak. VI. Emakumeen Master Cup Binakako Txapelketako finalak, hiru modalitatetan.
1. partida. Pilota goxoa gazteak: Olatz Intxausti (Antzuola)-Irati Betegi (Aretxabaleta) / Uxue Perez-Aiala Uriarte (Lezama).
2.partida. Goxoa senior. Nagore Aramendi (Azpeitia)-Lore Etxaniz (Etxebarria) / Marie Goienetxe-Oneka Bereau (Senpere).
3.partida. Pilota mistoa Promozioa. Ainhoa Romero (Lemoa)-Irati Zabala (Lizartza) / Nagore eta Leire Galeano (Antzuola).
