Goierriko Bertsozale Elkartearen 40. urtemuga dela eta antolatu dute. Taldeak osatu eta apirilaren 5erako eman behar da izena.
Gabiriako eta Urretxuko bertsolariek jokatu zuten 2014ko Atera! txapelketako finala // Argazkia: Aimar Maiz 
Goierriko Bertsozale Elkartea sortu zeneko 40. urtemuga ospatuko dute aurten, 40 urtez herria bertsoz josten lemapean. Ospakizun ekitaldien barruan, lehiaketa berezi bat antolatu dute: Goierriko taldekako bertso-txapelketa.
Lehendik ere izanak dira antzeko ekimenak eskualde mailan. Urretxu-Zumarragan egiten den Martxoan Bertsoa ekimenaz gain, 2007an eta 2014an, Atera! izeneko txapelketa ere antolatu zen, Goierri mailakoa eta taldeka. Oraingoari, Herrimatuz izena jarri diote.
Oraindik txapelketarako data zehatzik ez dute aurreratu, baino dagoeneko taldeak osatu eta izena emateko deia egin dute. Horretarako, goierrikobertsozaleelkartea@gmail.com posta helbidera idatzi behar da, apirilaren 5a baino lehen.
Saioen formatuari dagokionean, taldeek agur original bat prestatu beharko dute aurrez. Ondoren, hiru ataletan banatuko da saioa. Aurrenekoan, errima erronda, koplaka (poto egin arte) eta habanera osatu beharko dute, errimak emanda. Bigarrenean, bakarka objektu bati kantatu, ofizioa zortziko txikian, eta bukaera emanda bertsoa osatu beharko dute. Azkenekoan, berriz, pertsonaia ezkutua asmatu, pasapalabra eta potokumeak jolasak egin beharko dituzte.
