Goierriko Bertso Eskolaren 40. urtemuga dela eta, Goierriko Taldekako Bertso-Txapelketa antolatu dute. Bederatzi talde ariko dira lehian. Legorretaz gain, Seguran eta Ordizian jokatuko dira kanporaketak.
2014ko taldekako bertso txapelketaren finala, Zaldibian // Aimar Maiz 
Goierriko Bertso Eskolak 40 urte bete ditu, eta hori ospatzeko, beste ekitaldi batzuen artean, Herrimatuz Goierriko Taldekako Bertso-Txapelketa antolatu dute. Hiruna laguneko bederatzi taldek parte hartuko dute, eta hiru kanporaketa saio jokatuko dituzte, lehen fasean.
Txapelketa gaur hasiko da, Legorretan egingo duten lehen kanporaketarekin. Yeaah, Azken hondarrak eta De guays taldeak ariko dira lehian. Saioa 22:30ean hasiko da, Gaztetxean. Datozen bi ostiraletan egingo dituzte 2. eta 3. kanporaketak, Segurako Elorripen eta Ordiziako Kirkilen, hurrenez hurren. Finala, berriz, ekainaren 10ean izango da, Beasaingo Arranon.
Ez da Goierriko Bertso Eskolak antolatzen duen aurreneko taldekako lehia. 2007an ere egin zuten, 25. urtemugan, eta baita 2014an ere, biak ere, Atera izenarekin.
