Txerri hilketaren festa ospatu du Legazpin La Bellota elkarteak
Txerri hilketaren festa ospatu dute Legazpin. La Bellota elkarte extremadurarrak haien kulturaren zabalpenerako erabiltzen du egun hau, legazpiarrei txerrikia prestatuz.
Gaurkoan Legazpiko Azokan txerri hilketaren festa ospatu dute La Bellota taldearen eskutik. Hauek extremadurar kultura hedatze aldera antolatzen dute jai hau eta txerrikia prestatzen dute probatu nahi duen ororentzat. Giro aparta izaten da eta herritar ugari gerturatu dira gaurkoan ere.
Iada badira 27 bat urte taldea sortu zutenetik, pandemia garaian baitzuten izatez 25.urteurrena ospatzeko urtea, baina egoera zela eta ezin izan zuten legazpiarrekin ospakizun hau egin. Hala ere, beste urte batez txerrikia prestatzeko gogoz hartu dute gaurko eguna. Lagun arteko afari batean jaio zen ideia hau eta 27 urte beranduago ere ideia berarekin jarraitzen dute. Hala esan du La Bellota elkarteko lehendakariak, eta «harro» daudela adierazi du. Horrez gain, lehendakariak esandakoaren arabera «oso pozik» daude legazpiarrekin, asko laguntzen baitiete. Bestalde, egun hau antolatzeko «errelebo falta» ere mahaigaineratu du, kezkaz. Aipatu duenaren arabera, zenbait gaztek laguntzen dute antolakuntzan, baina dirudienez «ez da nahikoa». Hau hala izanik, hasi zirenean baino txerriki gutxiago prestatzen dutela aipatu du, adinean aurrera joan ahala gehiago nekatzen baitira guztiak. Horregatik, beste urteetan 150 ogi inguru erabiltzen zituzten arren, aurtengoan 110 inguru erabili dituzte. Hala ere, bertaratu direnek diotenaren arabera, txerrikia «beti bezain ona» zegoen gaurkoan ere eta ardoa ere «bikaina» omen zegoen. Datorren urterako «gogoz» geratu dira.