Idiazabaldarrak San Blas jaietan murgilduta daude. 19:00etan udaletxeko balkoitik jaitsi da Axaria beste urte batez eta hasiera ofiziala eman die jaiei, nahiz eta pasa den asteburuan ere makina bat ekintza izan ziren sanblasen aitzakian.
Axaria jaitsi aurretik pregoia irakurri dute udaletxeko balkoian Izal Bizia ostalari, zerbitzu eta merkatarien elkartekoek, goraino beteta zegoen plazaren aurrean. Aurten eurena izan da jaiei hasiera emateko ohorea. Arantxa mertzeriko Belen Goiak, Klik estankoko Amaia Azurmendik eta Nekazarien sindikatuko Montse Delgadok irakurri dute mezua elkartearen izenean.
2022an sortu berria da Izal Bizia elkartea, herrian merkataritzak bizi duen egoerak kezkatuta. Hain zuzen, pregoian gogorarazi dute “herrian kontsumitzeak herria aberasten du. Aberastasuna herrian geratzen da, eta berriro banatzen da”. Herriko saltoki eta zerbitzuek “kalitatezko produktu eta zerbitzuak” eskaintzeaz gain, “arreta pertsonalizatua eta gertukoa” eskaintzen dutela ere azpimarratu dute. Herrian kontsumitzean dituen beste hainbat albo ondorio ere ekarri dituzte gogora, “joan etorriak gutxitzen dira, kutsadura murriztu eta energia aurreztu”, aipatu dituzte.Idiazabaldarrei festak ondo pasatzea opatuz amaitu dute mezua, “zaindu gaitezen elkar, Idiazabal Bizia nahi dugu!” aldarrikatuz.
Play back-a
Arratsaldeko 17:30ean, San Blas jaietan klasiko bihurtu den haurren play-back saioa izan da herriko plazan jarritako karpan. Jende ugari bildu du ekitaldiak eta haurrek eta gazteek ikuskizun ederra eskaini diete gerturatutako guztiei.
Igandera bitartean ekitaldi ugari antolatu dituzte Idiazabalen.
