Kepa Ormazabal eta Gari Ugarte Poitou-Charentesesko Tourrean ariko dira
Ormazabalek debuta egingo du Euskaltel Euskadirekin. Guztira, lau etapa izango ditu lasterketak.
Kepa Ormazabal Valladolideko Klasikoko helmugan besoak jasotzen. Sprint Cycling Goierriko bi txirrindulari izango dira Euskaltel-Euskadirekin Poitou-Charentesesko Tourrean: Gari Ugarte legazpiarra eta Kepa Ormazabal gabiriarra. Talde laranjak gaur ekingo dio lau eguneko erronkari, abuztuaren 25etik 28ra bitartean.
Ormazabalek, gainera, BBK-Euskaditik iritsita, debuta egingo du talde laranjarekin, stagiaire gisa.
Guztira, lau etapa izango ditu lasterketak. Lehen bi jardunaldiak luzeak izango dira, eta hirugarren egunean 27 kilometroko banakako erlojupekoa jokatuko dute txirrindulariek. Azken etapa, berriz, Poitiersen amaituko da.
