Kilometroak 2026

Ikastoletako gazte ugarik parte hartu dute Erronkan

Hamabosna laguneko 23 talde lehiatu dira euskal herri kiroletan eta jokoetan, goizean zehar. Guztiek ikastolako estalpean bazkaldu dute.

Aimar Maiz

Lazkao

2026/10/04

Gazte multzo koloretsua sortu eta osatu dute Erronkan parte hartu duten ehunka lagunek, goiz osoan, Lazkaon. Euskal herri kiroletan eta jokoetan hainbat lehiaketa egin dituzte. Lehenik, Kilometroetako lau guneetan banatuta; azkenik, Harizti Handi futbol zelaian denen arteko topaketan.

Tokan, giza-proban, koskol biltzen, txinga eramaten, eta lauko sokadan korrika egin dituzte probak. Lehiaketarenak amaitutakoan, ikastolako aterpera joan dira denak, eta Kilometroetako boluntarioek prestatutako paella erraldoietatik bazkaldu dute.

23 ikastolak bidali dute ordezkaritza Erronkara, bakoitza 15 lagunek osatua. Haurtzaro, Uzturpe, Haztegi, Elgoibarko Ikastola, Zurriola, Arizmendi, Pasaia-Lezo, Jakintza, Orereta, Txantxiku, Santo Tomas, Aranzadi, Andramendi, Azpeitiko Ikastola, Orioko Ikastola, Zubimusu, Aita Larramendi, Anoetako Ikastola, Laskorain, Lazkaoko Ikastola, Salbatore Mitxelena, Udarregi eta Urretxu-Zumarragako Ikastola izan dira aurtengo Erronka kolorez jantzi dutenak.

Bazkal ondoren banatu dituzte sariak. Lehenbizi, bideo lehiaketako hiru sari eman dituzte. Talde bakoitzak bere buruaren aurkezpena eginez, hondoan Kilometroen abestia zutela, bideo bat egin eta Instagramera igo behar zuen. Atsegite gehien zituzten hiru hauek saritu dituzte:

Bideo lehiaketa:

1. Elgoibarko Ikastola, 1.476 puntu

2. Udarregi Ikastola (Usurbil), 1.255

3. Laskorain Ikastola (Tolosa), 895