Mintzalaguna programan parte hartzeko gonbita luzatu dute Legazpiko Udalak eta Udal Euskaltegiak
Ikasturte berria hastera doa, eta parte hartzeko izena eman behar da Euskaltegian. Gazteei dei berezia egin diete.
Matias eta Luengo udal zinegotzia eta teknikaria, Espada mintzalaguna eta Agirretxe euskaltegiko irakaslea, gaur, Mintzalagunaren ikasturte berriaren aurkezpenean.Tere Madinabeitia Mintzalaguna egitasmoa ikasturte berria hastera doa Legazpin, eta udalak eta Udal Euskaltegiak deia egin diete herritarrei parte hartzeko. Herrian euskaraz gehiago hitz egiteko aukerak sortzeko, eta herritarren artean euskararen erabilera sustatzeko helburuarekin jarri zen martxan duela urte batzuk Mintzalaguna, eta aurtengo ediziora osasuntsu iritsi da, bost talderen partaidetzarekin.
Mintzalaguna taldeetan parte hartzeko izena eman behar da Euskaltegian bertan, edo 843 74 00 90 telefono zenbakira deituta.
Gaur, ikasturte berriaren aurkezpena
Gaur goizean aurkeztu dute ikasturte berria Edurne Matias eta Leire Luengo udaleko euskara zinegotziak eta teknikariak, Ihintza Agirretxe Udal Euskaltegiko irakasleak, eta Rafa Espada mintzalagunak.
Euskaraz hitz egiteko eta praktikatzeko “aukera paregabea” da Mintzalaguna, eta Matiasek eta Luengok herritarrak animatu dituzte parte hartzera,”beldurrik gabe eta aurreiritziak alde batera utzita”. Udalak euskara sustatzeko eta bere erabilera indartzeko egiten duen apustuaren erakusle da, eta iaz martxan jarritako Aroa euskara planaren barruan kokatzen da.
Mintzalagunaren xehetasunak
Ihintza Agirretxe arduratu da xehetasunak emateaz, lehenik Mintzalaguna “euskaraz hitz egiteko ohitura eta konfiantza irabazteko” egitasmoa dela gogoratuz. “Askotan, jakinagatik, ingurua falta izaten zaigu euskaraz hitz egiteko, edo bizitza publikoa euskaraz egiten hasteko konfiantza irabazi behar izaten dugu. Mintzalaguna programak horixe du helburu: euskara hitz egiteko lagunartea, eta euskaraz hobeto egiteko konfiantza izateko babesgunea eskaintzea”.
Azaldu duenez, Mintzalagunean, “euskaraz hitz egiteko gogoa duten pertsonak elkartzen dira talde txikietan, normalean astean behin, modu lasaian eta informalean euskaraz aritzeko”. Ez dela klase bat azpimarratu du, ezta gramatika eskola bat ere, eta “ez dago azterketarik ezta ebaluaziorik ere”. Helburu bakarra euskaraz hitz egitea da, eta talde horietan euskara erabiltzen duten pertsonak edo gidariak eta euskara praktikatu nahi dutenak elkartzen dira, “kafetegi batean edo paseoan, kirolaz, musikaz, lanaz, aisialdiaz edo beste gai batzuetaz hitz egiteko”.
Euskaraz hitz egin nahi duen edonorentzako plana dela nabarmendu du, baina aurten bereziki gazteei egin nahi diete deia. “Badakigu gazte askok euskara ikasi dutela edo ikasten ari direla. Badakite euskaraz, baina askotan ez dute behar adina aukera aurkitzen hizkuntza erabiltzeko. Eta hizkuntza bat ikasteko eta hobetzeko, ezinbestekoa da erabiltzea”.
Animatzen badira, gainerako herritarrek bezala, “hitz egiteko lotsa galduko dute, euskarazko elkarrizketetan konfiantza hartuko dute, hiztegia aberastuko dute, ahozkotasuna eta jarioa hobetuko dute, euskara benetako egoeratan erabiliko dute, euskara eguneroko bizitzarekin lotuko dute, euskaraz aritzeko lagunak aurkituko dituzte eta batez ere, euskaraz hitz egitea geroz eta naturalago bihurtuko dute”.
Mintzalagun baten esperientzia
Rafa Espada donostiarrak ere animatu egiten ditu herritarrak Mintzalaguna programan parte hartzera. Lehen ere ibilia zen euskara ikasten, baina Legazpira duela urte gutxi bizitzera etorri zenean, berriz ere Euskaltegira jo zuen, eta berehala sartu zen mintza praktika talde hauetako batean.
“Oso ondo moldatzen naiz”, dio, “gure taldean gure gaiez hitz egiten dugu, musikaz edo asteburuan egindakoaz, eta hori oso ondo datorkit”. Esperientzia oso positiboa dela azpimarratu du.
