- Xabier Iraola Agirrezabala (ENBAko koordinatzailea)
Abenduaren 20an ahaztu ezineko eguna izango da Gipuzkoako nekazal sektorearentzat, egun horretan ospatu bait zen Enirio-Aralarko mankomunitateko batzarra, hain zuzen ere, azken urteotan egin gabe utzi diren azpiegiturei argi berdea eman zien batzarra.
Batzar aretoan ederki asko nabarmendu zen azken hilabeteotan bizitu dugun sestran izaniko alde bakoitzak Aralarkoari ematen dion garrantzia eta hala, bertan ziren, aurrez pankarta aurrean egondako ekologista bakan batzu eta bestalde, beren eguneroko bizi eta lana mendian egiten duen abeltzain mordoa.
Jendea etxetik atera eta mugiaraztea zenbat kostatzen den dakigunontzat, benetan hunkigarria izan zen atzoko argazkia eta abeltzainek erakutsitako erantzun indartsu eta paketsua (izan dituzten erasoak ikusita ez zen harritzekoa izango beste erantzun mota bat) eta argi geratu zen, mendian bizi eta lanegiten duenak, gai dela bere eguneroko bizimodua eta heuren familien etorkizuna defendatzeko.
Mankomunitateko udal ordezkariei dagokionean aldiz, botikan bezala, era guztietako portaerak ikusi genituen, nahiz egungo Aralar nahiz etorkizuneko Aralarrerako abeltzainen duintasuna bermatu behar dutela sinisturik eta beren herriko abeltzainen interesak babestuz baiezkoa eman zuten 10 ordezkariak (Ordizia, Altzaga, Beasain, Gaintza, Lazkao, Ataun, Amezketa, Orendain, Arama eta Abaltzisketa), duda-mudan murgildurik abstenitu zen Baliarrain eta Ordiziako udalaren eraikinean egon arren, batzarrean partehartu ez zuten laurak (Itsasondo, Legorreta, Ikaztegieta eta Zaldibia).
Bakoitzak ikusiko du zergatik jokatu zuen jokatu zuen modura, hori bai, gure eskerrona azaldu nahi diegu beren herriko kamixetarekin aritu ziren 10 “jokalariei— eta gure ohartarazpena, joku-zelaira ateratzeko gai izan ez zirenentzat.
Orain, hemendik aurrera, sekulako lana dugu paperean jasotako plangintzak gauzatzen baina argi dugu, atzoko indarraz baliatuta, elkarlanean, abeltzainak eta udal ordezkariek, beste behin ere, aurrera egingo dugula.
– Xabier Iraola Agirrezabala (ENBAko koordinatzailea)
