Orriek batu dituzte herriak
Euskarazko liburuen eta diskoen azokak egingo dituzte asteburuan Ataunen, Beasainen, Lazkaon, Ordizian eta Seguran. Aurkezpenak ugari, erosgaia oparo, eta kultura eskura
«Azokak batzen gaitu». Ohiturazko esaldi hutsetik harago, gero eta sustraituago dagoen ekimenaren goiburu bihurtu da, ia-ia, esapide hori. Goierriko bost herrik elkarlanean antolatzen duten euskal liburu eta disko azoken bultzagileek behin eta berriro errepikatu zuten, atzo, Lazkaoko aurkezpenean. «Azokak, euskarak eta euskal kulturak batzen gaituzte. Ez dago konpetentziarik hemen, elkartasuna eta elkarlana baizik», azaldu du Joxepa Madariagak.
Ostiraletik igandera ospatuko dira liburu azokak Ataunen (12.a), Beasainen (28.a), Lazkaon (29.a), Ordizian (11.a) eta Seguran (11.a). Irekitzen goiztiarrena Beasaingoa izango da, ostiralean 11:00etan —gainontzekoak arratsaldean—. Lazkaokoa, larunbatean egun osoan egongo da irekita, eguerdia barne. Eta igandean, bazkal aurrean itxiko dituzte denak, arratsaldean Bertsolari Txapelketa Nagusiko finalari beha egoteko.
Ohi bezala, Durangoko Azokaren ondotik datoz Goierrikoak, baina ez dio horrek interes punturik kenduko, haatik. «Nobedadeak eta hain berriak ez diren tituluak eskainiko ditugu. Material interesgarriak ekartzen saiatu gara. Ez da erraza, Durangok agintzen duelako argitaletxeengan, gaur egun». Enkarguak ere hartuko dituzte.
Bost herrietan, %15eko deskontua izango dute produktuek. Herri bakoitzeko udalak finantzatuko du, euskarazko ekoizpena kontsumitzeko laguntza izate aldera. «Kultura-gosea asetuko dugula espero dugu. Bost herri, elkarte asko, eta jende multzo handia dago azoken atzean». Aurkezpen ugarirekinAzoka guztietan %15eko deskontua egingo diete erosleei, udalek finantzatuta
Ataungoa antzokian egingo da aurten. Ordizian tokia Zuhaiztiko lokal batera aldatu dute
Jakoba Errekondo./Mikel Albisu
