

Manifestazioa egin zuten atzo Areizaga-Kalebarren plazatik aterata, ibilbidean herritar ugari batu zen

Antioko interpretazio zentroaren inaugurazioa atzeratu du Mikel Serrano Zumarragako alkateak. Hasiera batean Santa Isabel egunerako zentroa irekita egongo zela iragarri bazuen ere, hainbat baldintza tarteko inaugurazioa «uztailean» izango dela esan du, baina ez du data zehatzik aurreratu. Edozein modutan, Santa Isabel egunerako, uztailak 2, «prest dauden zerbitzuak irekiko ditugu»; zerbitzu horiek zehazki zeintzuk izango diren ere ez du esan.

Hogeita hamalaugarren urtez ospatuko da datorren igandean Dantzari Txiki Eguna Urretxun. Lurra dantza taldearen ardura izan da hasieratik jaialdi hau antolatzea. Juan Luis Elgarresta, Lurrako kideak gogoratzen duenez, «hasieran aldarrikapen kutsua» zuen festa bazen ere, gaur «asko aldatu» da. Euskal folklorearen adierazpen izaten jarraitzen du egun honek, baina gehiago da «haurrek urte guztian ikasitakoa erakusteko» agertoki bat, beste ezer baino.

Zumarragako VI. Pintxo Lehiaketa ospatuko da asteburuan. Herriko 14 tabernek hartuko dute parte guztira: Alexander, Arkupe, Berri, Bidezar, Bordatxo, Hirukia, Iburreta, Kakueta, Kortaberri, Monterrey, Saski, Txanpon, Zelaikoa eta Ziaboga. Urtean bi lehiaketa antolatzen dituzte: Santa Isabel jaien atarian bat; eta azaroan bestea, buzkantza lehiaketaren testuinguruan.

Asteburuan etxebizitza bat hustu behar izan dute Beasainen, luizi baten ondorioz. Larunbat arratsaldeko 15:30 aldera, Bista Alai kaleko 9. zenbakiaren gainera etorri zen lurra, Sagastigoiti aldetik. Teknikariak eta udaletxeko arduradunak berehala joan ziren, eta ingurua aztertu ondoren, segurtasun arrazoiengatik, etxe hartako sei bizitzetako biztanleei bertatik ateratzeko eskatu zieten; batzuk etxetik kanpo pasa zuten gaua, baina gainontzeko familiek atzera itzultzeko aukera izan zuten.

Urretxu-Zumarragako gaztetxeak 11. urteurrena ospatzeko festa egin du asteburuan. 2002ko ekainaren 22an zabaldu zituen ateak gaztetxe berriak lehenengoz, Urolako trena izan zenaren geltoki zaharrean. Ordutik, urtero ospatu izan dute urteurrena ekaina guztian zehar. Ekintzak hil guztian zehar luzatuko diren arren, pasa den larunbatean ospatu zuten egun handia Ez galdu norantza lelopean.

Asteburu honetan hasi da Gipuzkoako gizonezkoen giza proba txapelketa Aian. Urretxu, Zizurkil eta Aiztondo-Oarso taldeek neurtu dituzte indarrak, txapelketako lehenengo kanporaketan. Azkenean, Urretxuko taldea izan da irabazlea, bigarrenari plaza bateko aldea aterata. Urretxuarrek 52 plaza, zinta bat eta 2 metro osatu dituzte Aiako tiraldian. Mikel Elgarresta taldeko kidea egindako markarekin «oso gustura» agertu da. Txapelketari begira «bigarrenari plaza bateko aldea ateratzea abantaila handia da, gainera», esan du.