Ordiziako azokak abuztuko lehen asteazkenean ere bere horretan jarraitu du. Berritasun ugari aurkitzeko aukera izan dute bertara inguratu direnek.
Bazen mugimendua gaur goizean Ordiziako ferian. Postu gehienak beteta ziren, nahiz eta bazen oporretan zegoenik ere. Aste honetan normaltasunera itzuli da feria; orain bi aste Ordiziko jaiekin batera egokitu baitzen, eta egun bat aurreratu zen feria aurreko astean San Inazio eguna zela eta.
Maria Jesus Oriaren postuan baziren berritasun batzuk. Hurreak zeuden, kiloa 5 eurotan; baita melokotoiak ere, hauek 3 eurotan kiloa. Aire libreko tomatea ere eskuragarri zuen, kiloa 3 euroren truke. Lekari dagokionez, borobilak 4 euroan kiloa eta igitai formakoa 5ean.
Ez dira hor amaitzen feriako berritasunak. Patxiren postuan negutegiko eskarola zegoen kiloa euro batean, baita piper gorria ere, hau 3,5€/kg. Edurneren postuan basakanak aurki zitezkeen, gaurko feriako nobedade bat gehiago, kiloa 5,5 eurotan. Etxeko txerremena ere beste berritasun bat izan da ferian, 1,5 € kilo baten truke. San Inazio sagarra aurreko astean zen nobedade, San Inazio egunaren bueltan, baina gaurko ferian ere oraindik bazen sagar hau erosteko aukera.
Jose Antonio Aizpuru eta bere alaba Amaiaren postuan aranak zeuden aukeran. Aran gorria, beltza eta berdea prezio berean ziren: 2-3€ kiloko. Horia apur bat merkeago, 1-2€-tan kiloa.
Amaitzeko, mikologiaren atala. 85 kg onddo zeuden, 25-26€-an kiloa; 45 kilogramo zizahori, honen prezioa 18€ kiloko; eta gorringo 5kg, 33€ kiloa. Honez gain, bertako onddo kilo erdi bat ere bazen, kiloko 40€-ko prezioan.
