Bertsolari Txapelketa

Nerea Elustondo gailendu da Agurainen, eta aurrera egingo du Bertsolari Txapelketan

Lehen faseko azken kanporaketa jokatu da asteburuan Agurainen, eta Nerea Elustondok irabazi du, 695,5 puntu bilduta. Eibarren izango da legazpiarra, urriaren 31n.

Izaro Villarreal

Legazpi

2026/10/12

Lehenengo faseko azken bi saioak saioak jokatu dira asteburuan Gotaine-Irabarnen (Zuberoa) eta Agurainen (Araba). Xabat Illarregik (676,5 punturekin) eta Nerea Elustondok (695,5 punturekin) irabazi dituzte saioak, hurrenez hurren, eta dagoeneko erabaki dira finalaurrekoetara sailkatu diren bertsolari guztiak.

Datorren asteburua deskantsurako hartu, eta urriaren 24an jokatuko da finalaurrekoen lehenengo itzuliko aurreneko saioa, Larraun-Lekunberrin (Nafarroa). Bertsolari goierritarrik ez da izango bertan, baina Aizpea Garmendia lazkaotarrak egingo ditu gai-jartzaile lanak.

Nerea Elustondo legazpiarrak aurrez abisatu zuen inoizko prestatuen iritsi dela udazkenera, eta saio aparta eginda, hala erakutsi du: Miren Artetxeren atzetik, lehen fasean puntu gehien bildu dituen bertsolaria izan da, eta bete-betean eskuratu du finalaurrekoetara sailkatzeko txartela. Eibarren izango da, datorren urriaren 31n, eta Alaia Martinekin, Nerea Ibarzabalekin, Miren Artetxerekin, Oihana Iguaranekin eta Asier Azpirozekin osatuko du seikotea.

Amaia Iturriotz eta Eneko Araiztegi goierritarrek, ordea, ezin izan dute sailkapenean aurrera egin, berezko saioetan biek bigarren postua eskuratu arren.

Hauek dira bigarren faserako sailkatu diren bertsolari guztiak, puntuazioaren arabera: